「水果之王」榴槤,識得欣賞的人,覺得它芳香撲鼻,味道回甘,不喜歡的人單是聞到已經覺得非常難受,敬而遠之。這種水果並非人人鍾意,上月卻有商家創新推出榴槤放題,以 $390 任食榴槤做招徠,吸引不少愛「槤」者瘋狂搶飛,兩日六場逾 300 人的放題全場爆滿,坐無虛席。

今期 iM 專訪這位推出榴槤放題的「始作者」,榴槤BB的創辦人 袁家駒 (KK),如何跟馬來西亞政府合作搞了這場獨家放題。細問之下,原來 KK 並非榴槤瘋狂粉絲,「我都食榴槤,不過我鐘意睇人食,多過自己食。」

上月底,KK 破格搞過兩日共 5 場的榴槤放題,容納 300 多人,在一個半鐘內任食5種馬來西亞的榴槤,吸引不少榴槤 Fans 的注意。KK 眼見不少榴槤 Fans 都買不到票入場食,打算「食住呢鋪榴槤熱」,在九月再搞多兩日榴槤放題,更大膽在 7 月榴槤放題開始前幾日就售票,起初銷情卻未如理想。「可能大家怕中伏,所以抱觀望的態度,想睇下其他人食完放題的反應先再買。」

在第一日的放題完結之後,KK 發現有不少回頭客,食完放題當晚回購買 9 月的門票,到第二日放題完結後,門票更幾乎被搶購一空。「原定賣 900 張飛,心諗今次應該乜都夠,點知仲賣凸哂。」KK 只好加宵夜場次,滿足一眾榴槤 Fans 的心願。

雖然榴槤 BB 和 馬來西亞聯邦農業促銷局 (FAMA) 合作,部分榴槤由馬來西亞政府贊助,但馬來西亞榴槤較泰國榴槤貴 3 至 5 倍,單是貓山王在榴槤 BB 賣 500 蚊個,唯榴槤放題只收每位 $390,計埋物流、人工,KK 坦言,「搞榴槤放題都預咗蝕。」最後埋單計數,榴槤 BB 都蝕了五位數字。

榴槤放題生意雖然蝕本,但榴槤 BB 贏得不少藝人捧場,亦有不少食客「食過番尋味」。創新的榴槤放題亦吸引大批香港媒體報導,賺盡名氣。KK 表示,「可以幫馬來西亞政府推廣榴槤,又可以幫榴槤 BB 做好 Brand Building (建立品牌形象),已經好值得。」

全文見第 461 期《iMoney Focus》的專欄「一條蹺的誕生」。

閱讀全文:
屏幕截圖

🡑

X